Leikskólar landsins fá 4 tonn af pappír að gjöf

Fulltrúar Umslags, Odda og Póstsins, afhentu fyrstu kassana af pappír á leikskólanum Skógarborg þann 28. janúar síðastliðinn. Pappírsgjöfin er aðeins sú fyrsta af fjölda sambærilegra gjafa til allra leikskóla landsins sem dreift verður á næstu tveimur mánuðum. Gjafirnar eru liður í umhverfisverkefni sem beinir sjónum að ábyrgð pappírsframleiðenda sem hafa í meira en hálfa öld verið í fararbroddi í stækkun evrópskra skóga. Á hverjum degi eru ræktaðir upp skógar á svæði sem samsvarar 4363 knattspyrnuvöllum.
Kominn er tími til að umhverfissinnað fólk hætti að hafa samviskubit vegna pappírsnotkunar, því pappír á Íslandi er í sátt við umhverfið. Þetta eru skilaboðin sem Íslandspóstur, Oddi og Umslag hafa forgöngu um að koma á framfæri til almennings. Pappír hefur setið undir ómaklegum árásum og flökkusögum sem tími er kominn til að kveða í kútinn, segja forsvarsmenn þessara fyrirtækja. Við getum haft samviskubit vegna ýmislegs sem gert er á hlut náttúrunnar, en pappírsnotkun er ekki þar á meðal.
Í tilefni átaksins “Pappír í sátt” munu fyrirtækin þrjú færa öllum leikskólum landsins pappír að gjöf. Alls eru það ríflega fjögur tonn af pappír sem verður dreift um allt land í hendur leikskólabarna á næstu mánuðum. Kemur hann örugglega í góðar þarfir, ekki síst í ljósi þess niðurskurðar sem víða hefur þurft að grípa til.

Nokkrar staðreyndir um pappír:

• Pappír ógnar ekki regnskógunum. Þar hefur hins vegar verið gengið of nærri skógunum í landbúnaði.

• Pappírinn okkar kemur frá evrópskum framleiðendum sem eru í heimsforystu um góða og sjálfbæra nýtingu skóglendis.

• Skóglendi í Evrópu er ræktað upp á hverjum degi á svæði sem samsvarar 4363 knattspyrnuvöllum.

• 50% af þeim viðartrefjum sem eru í nýjum pappír koma úr endurunnum pappír.

• Hin 50% koma úr nytjaskógum, sem fara stækkandi með hverju ári, afgöngum frá byggingar- og húsgagnatimburvinnslu og frá nauðsynlegri grisjun á skóglendi.